- 476 -

1414 Okt. 28. Liegnitz.

Herzog Ludwig, Herr zum Brieg und Verweser zu Liegnüz, ertheilt den Gebrüdern Brockendorf das Recht, ihr Vorwerk Prinkendorf zu Bauern-Erbe aussetzen zu dürfen.

Wir Ludwig von gotis gnadin herczog in Slezien hirre zum Brige vnd vorwesir zu Legnicz bekennen vnd tun kunt vffintlich mit desim briue allin, die en seen, horin adir lesin, daz wir angeseen habin manchirleie getrawe vnd willige dinste, die vns die erbarn Cunrad Pauel vnd Jeronimus gebrudere Brockindorffer gnant burger zu Legnicz vnsir libin getrawin getan habin, teiglichin tun vnd in czukomftigin czeitin tun sullen, dorumme so habin wir en vnd alle eren erbin vnd elichin nochkomlingin von sunderliche befelunge, des erinwirdigin hern Wenczlen bisschoffis zu Breslaw, herczogin vnd hirren zu Legnicz vnsers hirren vnd libin vettern, dirlewbit, gegonst, dirlewbin, gonnen vnd gebin en iczunt dez gancze vnd volkomene macht, daz sie frei, vngehindirt vnd mechticlichin ir vorwerk Primkendorf genant, gelegin in dem Legnitschin weichbilde, zu gebawir erbe ausseczin mogin noch erim vnd alle erir erben nocz, frome vnd besserunge willin, daz sie auch habin sullin mit allin furstlichin rechtin, obirstin vnd nedirstin gerichtin, erin, geschossis, monczgeldis, bethegeldis, dinstis, stewir vnd allirleie beswerunge, welchirleie die weren, nichtis ausczunemen, wie daz namen hat, erplich vnd ewiclich zu besiczin, zu gebruchin, zu vorgebin, zu vorseczin, zu vorkewfin, zu vorwechsiln vnd domete zutun vnd zu lassin vnschedlich vns, vnsern erbin vnd elichin nochkomlingin hirren zu Legnicz an vnsern furstlichin leen, die wir vns doruffe behaldin vnd nichts mee. Mit orkunde dis briues, an den wir zu ewiger sichirheit dez egene vnsers hirrin vnd vettern, alz ein vorwesir dezselbin seines furstenthumes zu Legnicz gros ingesegil habin heissin hengin. Gegebin zu Legnicz an sente Symonis vnd Judin tag noch gotis gebort virczenhundirt jar vnd in dem virczendin jare. Dobeie seint gewest vnser libin getrawin her Hannos von Parchewicz, her Heintcze von Alczenaw, her Heintcze Ole, her Hannos von Ketzirdorf, Hannos von Langenaw, Peter Schiraw vnd Franciscus Briger, custos zum Brige vnser schreiber, deme desir briff befolin wart.

O. d. St. L. No. 251. An Schnüren von rother Seide das Siegel mit dem Rücksiegel von rothem Wachs. — Bitschens Privilegb. f. CCIIb.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866